नेपाल अपाङ्गता महिला संघले CBM द्वारा वित्तपोषित Action for Justice परियोजना अन्तर्गत २०२६ जनवरी ९ तारिखका दिन काठमाडौंस्थित होटल येलो पगोडामा वार्षिक सिकाइ कार्यशाला सम्पन्न गरेको छ।
वार्षिक सिकाइ कार्यशालाको नेतृत्व परामर्शदाता रिता श्रेष्ठ भद्राले गर्नुभएको थियो। घरधुरी भ्रमण स्वयंसेवक, विद्यालय स्वास्थ्य नर्स तथा अन्य स्वयंसेवकहरूलाई आफ्ना उपलब्धि, चुनौतीहरू र आगामी कार्यदिशा साझा गर्न कार्यशालामा आमन्त्रण गरिएको थियो।
बुढानीलकण्ठ नगरपालिकाकी उपमेयर अनिता लामाले कार्यक्रमको औपचारिक उद्घाटन गर्नुभएको थियो। उहाँले नेपाल अपाङ्गता महिला संघले अपाङ्गता भएका व्यक्तिहरूको जीवनस्तर सुधार गर्न नगरपालिकासँग निरन्तर रूपमा सहकार्य गर्दै आएको बताउनुभयो। साथै, आगामी वर्षहरूमा पनि NDWA सँग समन्वय जारी राख्ने प्रतिबद्धता व्यक्त गर्नुभयो।
कार्यक्रम दुई खण्डमा विभाजित गरिएको थियो। पहिलो खण्डमा परियोजना संयोजक आयुष्का श्रेष्ठले वर्षभरिका उपलब्धि, सामना गरिएका चुनौतीहरू, न्यूनीकरण उपायहरू तथा आगामी कार्ययोजनाबारे प्रस्तुति दिनुभयो। दोस्रो खण्ड परामर्शदाता रिता भद्रा श्रेष्ठद्वारा सहजीकरण गरिएको थियो, जहाँ सहभागीहरूलाई चार फरक-फरक समूहमा विभाजन गरी तोकिएका प्रश्नहरूमा छलफल तथा उत्तर प्रस्तुत गर्न लगाइएको थियो। परामर्शदाताले सबै सहभागीहरूका निष्कर्षहरू संकलन गर्दै सत्रको समापन गर्नुभयो।
कार्यक्रमको समापन तारकेश्वर नगरपालिकाकी उपमेयर सिर्जना बुर्लाकोटीले गर्नुभएको थियो। उहाँले घरधुरी भ्रमणमा संलग्न सबै स्वयंसेवकहरूको प्रशंसा गर्नुभयो। साथै, अटिजम भएका बालबालिकाका लागि विद्यालय निर्माण गर्ने आफ्नो नयाँ योजनाबारे पनि जानकारी गराउनुभयो।