नेपाल अपाङ्ग महिला संघको २४ औं साधारण सभा तथा १२ औं अधिवेशनले मीना पौडेलको अध्यक्षतामा संघको ११ सदस्यीय नयाँ कार्यसमिति चयन गरेको छ ।
संघको नवनिर्वाचित पदाधिकारीमा उपाध्यक्षमा शोभा विष्ट खतिवडा महासिचवमा देव कुमारी पराजुली सचिवमा सुनिता थापा र कोषाध्यक्ष मा दिपा खनाल रहेका छन् । यसैगरी सदस्यहरूमा एलिजा चापागाईं, चिजमाया विक, रामप्यारी कार्की, उमा खनाल, सरिता थापा मगर र इन्दिरा विष्ट रहेका छन् । संघको विधान अनुसार दुईजना सदस्य कार्यसमितिले मनोनित गर्नेछ । कार्यसमितिको कार्यकाल ३ वर्षको हुनेछ ।
यसअघि नेपाल अपाङ्ग महिला संघको २४ औं साधारण सभा तथा १२ औं अधिवेशनको उद्घाटन बुढानीलकण्ठ नगरपालिकाका उपप्रमुख अनिता लामाले गर्नुभएको थियो । उद्घाटन सत्रपछिको बन्दसत्रमा संघका महासचिव देव कुमारी पराजुलीले संघले वर्षभरी गरेका कामको प्रगती प्रतिवेदन र भावी कार्यक्रम प्रस्तुत गर्नुभएको थियो भने कोषाध्यक्ष शोभा विष्ट खतिवडाले संस्थाको आर्थिक प्रतिवेदन र आगामी वर्षका लागि अनुमानित बजेट प्रस्तुत गर्नुभयो ।
साधारण सभामा संघका पूर्व अध्यक्षहरू रमा ढकाल, निर्मला धिताल, निर्वतमान अध्यक्ष टीका दाहाल र नवनिर्वाचित अध्यक्ष मीना पौडेलले मन्तव्य राख्ने क्रममा अपाङ्गता आन्दोलनभित्र महिलाहरूलाई फुटाएर फाइदा लिन खोज्नेदेखि सतर्क रहन सदस्यहरुलाई सचेत गराएका थिए ।
नेपाल अपाङ्ग महिला संघले धेरै अपाङ्गता भएका महिलाको अधिकार स्थापित गर्न खेलेको भुमिका नविर्सन आग्रह गर्दै उनीहरूले नेतृत्वलाई सघाइ आन्दोलनलाई बलियो बनाउन आग्रह गरे ।